Кина: Новите царини на Трамп го поткопуваат мултилатералниот трговски систем

ИСТАНБУЛ (АА) - Кина денес ги повика Соединетите Американски Дрќави (САД) да ги решаваат своите трговски разлики со другите земји на рамноправен начин, велејќи дека новите царини што ги најавил американскиот претседател Доналд Трамп претставуваат чекор што го поткопува мултилатералниот трговски систем заснован врз правила, јавува Анадолу.

Портпаролот на кинеското Министерство за надворешни работи, Гуо Џиакун, за новинарите во Пекинг изјави дека Кина „решително ќе преземе контрамерки за да ги заштити своите интереси“.

„Во трговска војна нема победник, а протекционизмот не води никаде. Кина ги повикува САД веднаш да ја исправат својата погрешна постапка и да ги решат трговските разлики со другите земји, вклучително и со Кина, на рамноправен, почитувачки и заемно корисен начин“, додаде Гуо.

Реакцијата на Пекинг дојде откако САД воведоа „реципрочни царини“ за своите трговски партнери, вклучително и царина од 34 отсто за Кина, што беше објавено од Трамп вчера.

Гуо оцени дека овој потег на американскиот претседател „сериозно ги прекршува правилата на Светската трговска организација и го поткопува мултилатералниот трговски систем заснован врз правила“.