Кремљ: Западот може да помогне во организирање на руско-украински мировни преговори

МОСКВА (АА) - Западот може да помогне во организирањето стабилни руско-украински мировни преговори, истакна портпаролот на Кремљ, Дмитри Песков, јавува Агенција Анадолија (АА).

„Комуникацијата со Западот може да биде водечки, армирачки и зајакнувачки елемент на таквата комуникација [руско-украинските мировни преговори], но директивите што доаѓаат оттаму се скрупулозно имплементирани од Киев“, рече Песков на брифингот со новинарите во Москва.

Коментирајќи ги изјавите на италијанскиот политичар Силвио Берлускони, кој предложи да се „намами“ рускиот претседател Владимир Путин на средба со неговиот украински колега Владимир Зеленски, Песков препорача Зеленски прво да биде „намамен“.

Москва континуирано го критикува Зеленски за отфрлањето на преговорите со актуелното раководство на Русија во рамките на законот што го потпиша минатиот месец по анексијата на делови од Украина.

Песков ја искоментира и пресудата на Хаг со која се признава немањето директна вина на Русија за соборувањето на малезискиот лет МХ17, нагласувајќи дека жали што Русија не била дел од претсудската истрага.

Што се однесува до самата пресуда, тој истакна дека Москва ќе ја објави својата проценка откако прво темелно ќе ја анализира.

Во однос на вчерашната резолуција на Меѓународната агенција за атомска енергија (IAEA), со која се повикува Русија да се повлече од нуклеарната централа во Запорожје, Украина, Песков рече дека Москва ќе остане во контакт со меѓународното тело.

Тој се осврна и на изјавата што Шведска ја објави неколку часа претходно, потврдувајќи дека гасоводите „Северен тек“ биле цел на саботажа или терористички напад кога беше предизвикана штета во експлозиите претходно годинава.

Песков рече дека соопштението ги потврдило наодите што руските разузнавачи јавно ги објавиле веднаш по инцидентот, и додаде: „Многу е важно да не се запре, многу е важно да се најде оној кој стои зад ова.“

На прашањето за поправката на гасоводот, Песков рече дека првин треба да заврши проценката на состојбата од страна на експертите.