Burç Eruygur
02 Декември 2024•Ажурирај: 03 Декември 2024
ИСТАНБУЛ (АА) - Кремљ денес негираше дека пратил порака до Украина преку германскиот канцелар Олаф Шолц, кој пристигна во Киев претходно дента, првпат по повеќе од две и пол години, јавува Анадолу.
Портпаролот на Кремљ, Дмитриј Песков, говорејќи за новинарите во главниот град Москва рече дека Русија нема никакви „очекувања“ од посетата на Шолц на Киев, но внимателно ги следи сите контакти што ќе се реализираат во главниот град на Украина.
Песков тврди дека Германија продолжува со својата политика на „безусловна поддршка“ за Украина. Москва со „задоволство“ го оцени неодамнешниот телефонски разговор меѓу Шолц и рускиот претседател Владимир Путин. „Дијалогот, се разбира, секогаш претставува позитивен развој“, рече тој.
Тој повтори дека главно за Русија во врска со речиси тригодишниот конфликт е да ги постигне сопствените интереси и цели, тврдејќи дека во Украина расте 'заморот' во однос на Владата на претседателот Владимир Зеленски.
„Судејќи според информациите и статистиките, се зголемува бројот на луѓето што повеќе не прифаќаат постојана војна. А ние, исто така, гледаме дека расположението во европските земји се менува“, додаде тој.
Шолц пристигна во ненајавена посета на Киев вторпат од почетокот на војната во Украина пред повеќе од 1.000 дена.
Во јуни 2022 година канцеларот ја посети Украина заедно со францускиот и романскиот претседател и тогашниот италијански премиер.
Шолц на социјалната мрежа Х рече дека за време на разговорите со Зеленски ќе најави дополнителна воена поддршка за Киев во износ од 650 милиони евра.
