Кремљ: Путин ќе оствари средба со турскиот шеф на дипломатијата при неговата посета на Москва

ИСТАНБУЛ (АА) - Кремљ денес соопшти дека рускиот претседател Владимир Путин ќе го прими турскиот министер за надворешни работи Хакан Фидан, кој денес ќе пристигне во дводневна посета на Москва, јавува Анадолу.

„Во текот на денот претседателот има планирано голем број работни средби во Кремљ, кои ќе бидат затворени. (Исто така) претседателот ќе го прими турскиот министер за надворешни работи Фидан, кој денес е во работна посета на Москва“, изјави портпаролот на Кремљ, Дмитриј Песков, за новинарите во руската престолнина.

Песков рече дека Путин и Фидан „природно“ ќе разговараат за Украина како „главна тема“.

Тој додаде дека Фидан ќе се сретне и со рускиот колега Сергеј Лавров, на разговори за билатералните односи.

„И, секако, размената на мислења за украинското прашање ќе биде задолжителна“, додаде тој.

Вчера, турското Министерство за надворешни работи ја објави дводневната посета на Фидан што започнува денес, без да даде дополнителни детали.