Макрон повика на нов меѓународен поредок како одговор на војната во Украина

АНКАРА (АА) - Францускиот претседател Емануел Макрон повика на „нов меѓународен поредок“ во услови на тековната војна во Украина. Говорејќи на „Средба за мир“, организирана од католичката заедница Сен Егидио во Париз, тој ги повика европските лидери да се подготват за повоената реалност со што ќе се преиспита организацијата на континентот, јавува Анадолу.

„Мора да бидеме доволно имагинативни за да размислуваме за мирот на утрешницата, мирот во Европа во нова форма“, изјави Макрон, промовирајќи инклузивна визија што се протега надвор од сегашните структури на ЕУ и НАТО. Тој ја истакна потребата од поширок пристап кон соработката и градењето мир, особено во однос на Балканот и географската реалност во Европа.

Макрон ги критикуваше актуелните институции, како ОН, Светската банка и Меѓународниот монетарен фонд (ММФ), за неуспехот адекватно да одговорат на современиот свет.

„Нашиот поредок денес е нецелосен и неправеден. Многу од најнаселените земји не постоеја кога беа распределени местата“, рече тој.

Во врска со минатите критики во однос на неговиот пристап кон Русија, Макрон го повтори своето верување во неопходноста од помирување на односите со земјата, иако во нова организациона рамка. Тој нагласи дека Европа треба да ги „преиспита“ своите интеракции со Русија во светлина на тековниот конфликт во Украина.

Во мај 2022 година, набргу по почетокот на руската војна во Украина, тој беше критикуван за изјавата дека Русија не треба да биде „понижувана“.

Неговото неодамнешно двоумење за исклучување на можноста за праќање француски војници во Украина, исто така, предизвика критики од Западот.

Макрон нагласи дека ќе ја искаже својата загриженост пред Генералното собрание на ОН, каде што, како што рече, ќе се залага за глобални реформи за создавање „поправедни“ и поинклузивни меѓународни институции.

„Ќе се вратам на ова во ОН оваа недела“, истакна францускиот претседател, нагласувајќи ја ургентноста на овие реформи.

По говорот за европската безбедност Макрон ги коментираше и тековните конфликти на Блискиот Исток, особено во Газа. Тој истакна дека мирот мора да биде вкоренет во „соживотот“ и признавање на правата на сите поединци со цел да живеат мирно.

Ситуацијата во Газа продолжува да се влошува и, според локалните здравствени власти, во бруталната офанзива на Израел убиени се над 41.400 Палестинци, главно жени и деца, а над 95.800 се повредени. Конфликтот го расели речиси целото население на енклавата, чија состојба е влошена со блокадата што доведе до сериозен недостиг на основните продукти за живот.

Израел се соочува со случај за геноцид пред Меѓународниот суд на правдата поради неговите дејства во Газа.