Мигрант загина при обид со параглајдер да влезе во шпанската енклава Сеута

Млад мигрант загина денес откако паднал во морето при обид со параглајдер да влезе во шпанската северноафриканска енклава Сеута од Мароко, јавува Анадолу.

Шпанската новинска агенција ЕФЕ, повикувајќи се на извори од Цивилната гарда, јави дека припадниците на службата го пронашле телото на младиот мигрант од супсахарска Африка по несреќата во близина на северната граница на Сеута.

Инцидентот се случил околу 8 часот по локално време, кога службениците забележале лице кое со параглајдер се обидувало да стигне до градот од планинскиот предел околу Бензу, во близина на мароканската граница.

Припадниците на Цивилната гарда веднаш се упатиле кон местото, надевајќи се дека мигрантот е сè уште жив, но утврдиле дека починал.

Телото подоцна било пренесено во објектите на Поморската служба на Цивилната гарда.

Според ЕФЕ, ова е прв регистриран смртен случај на мигрант при обид со параглајдер да влезе во Сеута.

Цивилната гарда во изминатиот период евидентирала повеќе поединечни обиди на мигранти од супсахарска Африка да стигнат до енклавата со параглајдер, особено од минатата година.

Властите регистрирале и неколку несреќи, кои ги поврзуваат со ограниченото искуство на мигрантите во управувањето со оваа опрема.