Мјанмар прогласи седумдневна жалост поради разорниот земјотрес во кој загинаа над 1700 лица

ИСТАНБУЛ (АА) – Мјанмар денес прогласи седумдневна национална жалост поради разорниот земјотрес со интензитет од 7,7 степени, кој го погоди централниот дел на земјата во петокот, јавува Анадолу.

Државното знаме ќе биде спуштено на половина копје во знак на жалост, соопшти државната телевизија МРТВ.

Бројот на загинати надмина 1.700, додека повеќе од 3.400 лица се повредени, а над 300 се водат како исчезнати.

Во меѓувреме, лидерот на воената хунта на Мјанмар, генерал Мин Аунг Хлаинг, вчера оствари телефонски разговор со малезискиот премиер Анвар Ибрахим.

Двајцата лидери разговараа за последиците од земјотресот, како и за активностите за спасување и пружање помош.

Русија, Индија, Кина, Тајланд, Обединетите Арапски Емирати (ОАЕ), Обединетите нации (ОН) и други земји испратија специјализирани тимови за пребарување и спасување, како и хуманитарна помош.