На Западниот Брег приведени уште 28 Палестинци, бројот порасна на 6.420

РАМАЛА (АА) - Израелската војска денес приведе уште 28 Палестинци во различни области на окупираниот Западен Брег и Источен Ерусалим (Источен Кудс), пренесува Анадолу.

Во заедничкото соопштение објавено од Комисијата за прашања на притвореници и поранешни затвореници и Здружението на палестински затвореници се вели дека со новите апсења вкупниот број Палестинци приведени од израелските сили од 7 октомври достигна 6.420.

За време на израелските кампањи за апсење, војниците, исто така, тепале, малтретирале Палестинци и спроведувале испрашувања, проследени со предизвикување штета на нивните домови и друг имот, се наведува во соопштението.

Во својот годишен извештај двете групи рекоа дека вкупниот број палестински затвореници во израелските затвори на крајот на декември 2023 година изнесувал 8.800, од кои 80 се жени.

Тензиите се високи низ Западниот Брег откако избија борби во Газа на 7 октомври меѓу палестинските групи и Израел.

Според палестинското Министерство за здравство, најмалку 380 Палестинци се убиени од израелските сили на Западниот Брег од 7 октомври, со над 4.000 повредени.