Над 6 милиони тони жито извезени од Украина од август

АНКАРА (АА) – Над 6 милиони тони жито се извезени од Украина од август според договорот од Истанбул, соопшти денес турското Министерство за национална одбрана, јавува Агенција Анадолија (АА).

Туркије, Обединетите нации, Русија и Украина на 22 јули потпишаа договор во Истанбул за продолжување на извозот на жито од три украински пристаништа на Црното Море, што беше прекинат по почетокот на Руско-украинската војна во февруари.

Во Истанбул беше формиран Заеднички координативен центар со официјални претставници од трите земји и Обединетите нации за надгледување на испораките.

Во меѓувреме, денес уште осум бродови ги напуштија украинските пристаништа, соопшти Министерството.

Откако првиот брод на 1 август ја напушти Украина, според договорот, досега украинските пристаништа ги напуштија над 260 бродови со повеќе од 6 милиони тони земјоделски производи.