Ekip
23 Август 2022•Ажурирај: 25 Август 2022
АНКАРА (АА) - Врховниот командант на вооружените сили на Украина денес изјави дека од почетокот на војната досега се убиени речиси 9.000 украински војници, известува Агенција Анадолија (АА).
„Во оваа војна не учествуваат само војниците и не само оние кои се фатиле за оружје, туку и нашите мали деца, кои воопшто не се виновни за ништо, освен што се родени овде и во ова конкретно време“, рече Валери Залужњи за време на настанот „Бранители. Форум за прозивки“.
Тој во врска со децата изјави: „Тие не разбираат што се случува, но дефинитивно им треба заштита и кај Соледар, Бахмут, Велика Новосилка и овде, бидејќи нивниот татко отишол на фронтот, можеби, е еден од оние речиси 9.000 херои кои ги загубија своите животи“.
Залужњи, сепак, не прецизираше дали бројката се однесува само на припадниците на вооружените сили или, исто така, на други формации и кој период опфаќа.
За време на настанот пред учесниците се обрати и претседателот на Украина.
„Моето денешно обраќање е, се разбира, првенствено за ветераните. Но, тоа не е само за ветераните. Не само за нашите воини и сите оние кои го посветуваат својот живот на служење на Украина со оружје во рацете. Овој мој апел е за сиот наш Народ. И се работи, за фактот дека каузата на ветераните навистина стана национална. Тоа е прашање и на државата и на нашето општество“, рече тој, цитиран од официјалната веб-страница на Претседателството.
На форумот присуствуваа и Руслан Стефанчук, претседателот на Врховната Рада (парламент), премиерот Денис Шмихал, шефот на Кабинетот на претседателот Андриј Јермак, секретарот на Советот за национална безбедност и одбрана Алексеј Данилов, пратеници и владини претставници.
По руската инвазија на 24 февруари, руско-украинската војна оваа недела ќе одбележи шест месеци од почнување на конфликтот кој го потресе целиот свет.
Додека Киев се подготвува да го одбележи Денот на независноста оваа недела, војната продолжува на фронтот кој се протега во должина од 1.300 километри, денес концентрирана во источниот регион Доњецк, како и во јужните региони на земјата.
