Најмалку 54 Палестинци убиени во најновите воздушни напади на израелската армија врз Газа

ГРАД ГАЗА / ИСТАНБУЛ (АА) – Најмалку уште 54 Палестинци се убиени, а десетици се повредени во најновите израелски напади денес низ разурнатиот Појас Газа, соопштија медицински лица, јавува Анадолу.

Медицински извор изјави дека 16 лица се убиени во израелското гранатирање на училиште претворено во засолниште во населбата Ал-Туфа во градот Газа.

Неколку лица сѐ уште се заробени под урнатините, изјави изворот.

Денешниот напад се случи еден ден откако беа убиени најмалку 33 лица, а 73 повредени во израелски напад врз училиште во бегалскиот камп Бурејџ во централна Газа.

Според податоците објавени од владината Канцеларија за медиуми на Газа, најмалку 234 засолништа и центри за раселување беа цел на израелската армија од почетокот на нејзината геноцидна војна во октомври 2023 година.

Најмалку уште 22 лица се убиени во друг напад на преполн пазар на улицата Ал-Вахда во градот Газа, изјави друг медицински извор.

Изворот рече дека меѓу жртвите има неколку деца и еден новинар.

Според репортерот на Анадолу, нападот е извршен врз многу продавници и тезги и во време кога пазарот бил преполн со луѓе.

Осум лица, меѓу кои и едно дете, се убиени во друг напад врз куќа во јужниот град Кан Јунис, изјави медицински извор за Анадолу.

Во источниот дел од овој град убиени се еден Палестинец и неговата сопруга откако израелските сили го гранатираа нивниот дом во градот Бени Сухејла, соопшти изворот.

Израелската армија уби уште тројца Палестинци, меѓу кои и едно дете, во бегалскиот камп Мунасира, источен Деир ал-Балах, во централниот дел на Појас Газа, соопштија медицински лица.

Тројца Палестинци се убиени, а неколкумина се повредени во израелски воздушен напад врз куќа во источната населба Тел ал-Затар во бегалскиот камп Џабалија во северна Газа.

Според сведоци, израелската армија спровела уривање на куќи во бегалскиот камп Нусејрат.

Израелската армија започна брутална воена офанзива врз Газа, при што од 7 октомври 2023 година убиени се повеќе од 52.600 Палестинци, претежно жени и деца.

Во ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.