Нетанјаху вели дека Израел ќе ја преземе „цела Газа“, признава дека се врши притисок за влез на помош

ЕРУСАЛИМ / АНКАРА (АА) – Израелскиот премиер Бенјамин Нетанјаху денес изјави дека израелската армија ќе ја преземе контролата врз „цела Газа“, притоа признавајќи дека се зголемува меѓународниот притисок врз Израел да дозволи влез на хуманитарна помош во опколената палестинска енклава, јавува Анадолу.

Израел „ќе ја преземе цела Газа, тоа е она што ќе го направиме“, рече Нетанјаху во видеопорака на својот профил на X.

Нетанјаху призна дека притисокот врз Израел „се приближува кон црвената линија“, принудувајќи го Израел да продолжи со испораките на помош за Газа.

Од 2 март Израел ги држи затворени сите премини кон Газа за испорака на храна, медицински и хуманитарни средства, продлабочувајќи ја веќе тешката хуманитарна криза, според податоци од владини, хуманитарни и меѓународни извештаи.

Според Светската банка, речиси 2,4 милиони жители во Газа целосно зависат од хуманитарна помош. Агенцијата на ОН за палестински бегалци (УНРВА) соопшти дека стотици илјади Палестинци се хранат само еднаш на секои два или три дена поради разорната израелска блокада.

Според Агенцијата на ОН за палестински бегалци (УНРВА), стотици илјади Палестинци јадат само еден оброк на секои два или три дена, поради строгата блокада на Израел.

Во неделата Нетанјаху најави дека Израел ќе дозволи влез на „основно количество храна“ за 2,4 милиони жители на Газа „за да се спречи појава на глад“.

Според израелското армиско радио, Израел ќе дозволи влез на девет камиони со помош во Газа, по речиси 80 дена тешка блокада и пустошење на територијата.

„За да ја завршиме нашата победа, да го поразиме Хамас и да ги ослободиме заложниците, не смееме да дозволиме појава на глад“, рече Нетанјаху.

„Во спротивно, нема да имаме поддршка“, додаде тој.

Израелската армија спроведува брутална офанзива против Газа од октомври 2023 година, во која се убиени повеќе од 53.300 Палестинци, повеќето од нив жени и деца.

Минатиот ноември Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата поради својата војна во енклавата.