Нова вулканска ерупција на полуостровот Рејкјанес во Исланд

РЕЈКЈАВИК (АА) – Нова вулканска ерупција започна вчера изутрина на јужниот дел од исландскиот полуостров Рејкјанес, објавија локалните медиуми, пренесува Анадолу.

Лавата веќе ги проби заштитните бариери околу градот Гриндавик, соопшти јавниот радиодифузер РУВ.

Според локалните власти, Гриндавик, кој се наоѓа јужно од главниот град Рејкјавик, претходно бил евакуиран, иако неколку жители одлучиле да останат.

Туристите и жителите во областа, вклучително и оние во близина на популарната термална бања „Сината Лагуна“, добиле СМС-известувања на неколку јазици со повик за брза и безбедна евакуација.

Рунолфур Торхалсон, шеф на Одделот за цивилна заштита, за РУВ изјави дека ерупцијата би можела да биде многу поголема од претходните и дека магмата се шири на значително поголема должина.

Од почетокот на вулканската активност досега се регистрирани повеќе од 200 земјотреси, од кои најсилниот бил со јачина од 4 степени.

Ова е 11-та вулканска ерупција од 2021 година, кога вулканската активност повторно започна, по речиси 800 години мирување на полуостровот Рејкјанес.

Исланд, кој се наоѓа на Средноатлантскиот гребен, е една од вулкански најактивните земји во светот, со околу 30 активни вулкански системи.