ОАЕ известија за ирански напад со беспилотно летало врз телекомуникациската зграда во Фуџајра

Властите во Фуџајра, на источниот брег на Обединетите Арапски Емирати (ОАЕ), интервенираа по иранскиот напад со беспилотно летало, чија цел била зграда на телекомуникациската компанија „Ду“, објави денес новинската агенција на Емиратите, ВАМ, пренесува Анадолу.

ВАМ додаде дека нема пријавено повредени лица.

Претходно властите во Абу Даби соопштија дека остатоци од ракета паднале врз објект во индустриската зона Мусафа, по успешната интервенција на воздушната одбрана.

Во овој инцидент со повреди се здобил еден државјанин на Гана, пренесе ВАМ.

Непријателствата во регионот ескалираа откако САД и Израел започнаа заедничка офанзива врз Иран на 28 февруари, во која досега загинаа повеќе од 1.340 луѓе, вклучително и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што се наоѓаат американски воени бази, предизвикувајќи жртви и уништување на инфраструктурата, истовремено нарушувајќи ги глобалните пазари и авиосообраќајот.