ОИС усвои декларација за прашањето на Кашмир

ИСЛАМАБАД

На 47 состанок на Советот на министри за надворешни работи на земјите членки на Организацијата за исламска соработка (ОИС) во Ниамеј, главниот град на Нигер, усвоена е заедничка декларација со која од Индија е побарано да запре со давањето на „автохтон сертификат" на оние кои не се од регионот на Џаму и Кашмир, и избегнува чекори кои би можеле да влијаат на демографската структура на спорниот регион, јавува Агенција Анадолија (АА).

Во одлуката се отфрлени илегалните и едностраните акции на Индија во врска со регионот Џаму и Кашмир, кој меѓународната заедница го препознава како контроверзен регион и осудени се кршењата на човековите права во тој регион.

Укажано е дека Индија го крши и занемарува меѓународното право и одлуките и повикана е меѓународната заедница да ги преиспита своите односи со таа земја.

Истакнато е дека прашањето на Кашмир е исклучително важно за муслиманскиот свет, како и дека решението на тоа прашање е неопходно за мирот во јужна Азија.

Со Декларацијата Индија е повикана да се придружува до своите меѓународни обврски поврзани со човековите права и да му овозможи на специјалниот претставник и истажувачката мисија на ОИС да го посетат Џаму и Кашмир.

Во декларацијата, во која е повторена поддршката на ОИС за прашањето на Кашмир, нагласено е дека за спорот во регионот повеќе ќе се расправа на 48. состанок на Советот на министри за надворешни работиво Исламабад 2021 година.

Во Декларацијата е повторен начелниот став на ОИС кон мирно решавање на прашањето на Џаму и Кашмир во согласност со резолуциите на Советот за безбедност на Обединетите нации.

- Проблемот во Кашмир -

Кризата во Кашмир датира уште од 1947 година, кога Велика Британија го напушти тоа подрачје без да го реши статусот на регионот. Муслиманите сочинуваат 90 отсто од популацијата на Кашмир, а по повлекувањето на Британците побараа тој регион да се припои кон Пакистан. Тогашниот гувернер сепак, одлучи Кашмир да го припои кон Индија. Од добивањето независност од Британија во 1947 година, Џаму и Кашмир имаше привилегиран статус со кој можеше да донесува сопствени закони.

Пакистан и Индија во 1947 година влегоа во првата војна за Кашмир, а потоа повторно војуваа во 1965 и 1999 година.

Индија контролира околу 45 отсто од Кашмир, Пакистан околу 35 отсто, додека Кина 20 отсто. Индискиот дел е наречен Џаму и Кашмир и денес е единствената доминантно муслиманска сојузна територија во Индија.

Со одлуките на Советот за безбедност на ОН, донесени од 1948 година досега, се предвидува демилитаризација на Кашмир, а неговата иднина да се утврди со референдум.

Додека Индија искажува став против референдум, Пакистан е за спроведување на резолуциите на ОН.

Индиските власти на 5 август 2019 година го укинаа специјалниот статус на регионот Џаму и Кашмир, отповикувајќи го членот 370.