Педро Санчез останува на функцијата премиер на Шпанија и покрај обвинувањата против неговата сопруга

ЖЕНЕВА (АА) - Шпанскиот премиер Педро Санчез денес соопшти дека одлучил да продолжи да ја води Владата по неколкудневната политичка неизвесност поради обвиненијата за корупција против неговата сопруга Бегона Гомез, јавува Анадолу.

Санчез порача дека останува на функција премиер, а обвинувањата против неговата сопруга се резултат на кампањата насочена против неговото семејство.

„Одлучив да продолжам со уште поголема сила и волја“, изјави Санчез и додаде дека за тоа го известил и шпанскиот крал Фелипе Шести.

Санчез во средата ги критикуваше опозициските партии, велејќи дека соработувале со оние што поднеле тужби против неговата сопруга. По тој повод рече дека ќе размисли да поднесе оставка од функцијата премиер.

Истражниот суд во Мадрид поведе истрага против неговата сопруга Гомез под обвинение за злоупотреба на влијанието и корупција во бизнисот. Тужбата ја поднесе десничарската група „Чисти раце“.