Повеќето институции на ЕУ користат американски компании за е-пошта, што отвора прашања за дигиталниот суверенитет

Речиси три четвртини од институциите на Европската Унија ја насочуваат својата електронска пошта преку сервери управувани од американски компании, покажува истражување објавено денес од холандскиот јавен радиодифузер НОС, што отвора прашања за дигиталниот суверенитет на блокот, пренесува Анадолу.

Наодите доаѓаат во период кога Европската комисија сè повеќе ја нагласува потребата Европа да ја намали зависноста од странски технолошки провајдери, објави радиодифузерот.

Самата Европска комисија користи услуги за електронска пошта обезбедени од американски компании, додека Европската одбранбена агенција, неколку регулатори на финансиските пазари и телата на ЕУ надлежни за борба против тероризмот и спречување на перењето пари исто така го користат „Мајкрософт“ за услугите за електронска пошта.

Европската централна банка користи друга услуга за електронска пошта со седиште во САД, според наводите.
НОС соопшти дека Европската комисија не одговорила на прашањата каде физички се складираат податоците од нејзината електронска пошта.

За разлика од нив, Европскиот парламент, Европол и Судот на правдата на Европската Унија не користат сервери за електронска пошта со седиште во САД, според наводите.

Холандскиот европратеник Барт Гротхаус изјави за радиодифузерот дека услугите за електронска пошта што ги користат институциите на ЕУ мора да останат сигурни и дека преку нив редовно се разменуваат чувствителни информации.

„Ова е услуга што мора секогаш да функционира и преку неа редовно поминуваат чувствителни информации, па контролата мора да остане во европски раце“, рече Гротхаус, додавајќи дека Европа треба да избегне технолошка зависност од една земја.

Европратеничката Ким ван Спарентак исто така оцени дека институциите на ЕУ треба да размислат за преместување на ваквите услуги во рамки на блокот.