Премиерот на Австралија: Не можеме да им помогнеме на нашите граѓани кои се надвор од аеродромот во Кабул

МЕЛБУРН (АА) - Австралискиот премиер Скот Морисон истакна дека не можат да им помогнат во евакуацијата на своите граѓани и на Авганистанците со визи кои се надвор од Меѓународниот аеродром „Хамид Карзаи“, пренесува Агенција Анадолија (АА).

Премиерот Морисон на прес–конференцијата одржана во главниот град Канбера, истакна дека ситуацијата во Кабул е хаотична.

Наведувајќи дека не можат да им помогнат на Австралијците и Авганистанците со визи кои се надвор од аеродромот и кои сакаат да се евакуираат од оваа земја, Морисон рече: „Австралиските одбранбени сили или другите сили кои се таму не е можно да дејствуваат надвор од аеродромот.“

Морисон истакна дека Австралија досега евакуирала 162 лица од Кабул и дека ќе продолжат да работат на евакуација на повеќе луѓе.

- Повредени Австралијци кои се обидуваа да влезат на аеродромот -

Повредени се неколку австралиски државјани и лица со австралиски визи кои дошле на Меѓународниот аеродром „Хамид Карзаи“ во Кабул за да заминат во Австралија.

Австралија распореди два воени авиони и 250 војници за евакуација на околу 200 свои граѓани со нивните семејства кои работат во Обединетите нации во Авганистан и во невладини организации, и 400 Авганистанци кои им помагале на нивните воени единици.

Авионот, кој превезуваше околу 100 луѓе во рамките на евакуацијата, изутрина слета во Перт, главниот град на Западна Австралија.

Австралија, која ја затвори својата амбасада во Авганистан во мај, на 11 јули соопшти дека целосно ги повлекла своите војници од земјата.