Речиси 2.900 загинати во земјотресите во Мјанмар, 72 се водат како исчезнати во Тајланд

ИСТАНБУЛ (АА) - Бројот на загинати во земјотресите во Мјанмар се приближува до 2.900, додека 72 лица се водат како исчезнати во Тајланд, објави денес „Синхуа њуз“, пренесува Анадолу.

Според информативниот тим на Советот на државната управа на Мјанмар, бројот на загинати во Мјанмар достигна 2.886, со 4.639 повредени, а 373 сè уште се водат како исчезнати.

Во соседен Тајланд, 72 лица сè уште се водат како исчезнати во главниот град Бангкок, додека потрагата по телата продолжува на местото на урнатиот блок на кулата на Државната ревизија, објави денес тајландски ПБС.

Два разорни земјотреси, со магнитуда од 7,7 и 6,4 степени ги потресоа во петокот Мјанмар и Тајланд со епицентар во регионот Сагаинг, кој наводно претрпел најголеми штети.

Тајландските и меѓународните спасувачки тимови се менуваа во текот на ноќта, работејќи со кучиња трагачи и тешка опрема за да ги подигнат големите бетонски блокови со цел да стигнат до исчезнатите лица.

Официјален претставник на спасувачките служби призна дека на тимовите им е ограничена тешката машинерија што можат да ја распоредат истовремено.

Околу 100 работници беа во зградата на Државниот завод за ревизија во Бангкок кога се урна во петокот, по силниот земјотрес со епицентар близу регионот Мандалај во соседен Мјанмар.

Неколку земји му пружија помош на Мјанмар за справување со последиците од земјотресите. Јапонија денес соопшти дека е подготвена да обезбеди итна помош од 6 милиони долари за погодените од земјотресот.