Русија ги одбива наводите дека малезискиот авион MH17 e соборен од руски проектил

МОСКВА (АА) - Руското Министерство за одбрана го негираше Извештајот на Меѓународниот заеднички истражувачки тим (JIT) во кој се наведува дека малезискиот авион, кој во 2014 година се урна во источниот дел на Украина е погоден од руски проектил, пренесува Anadolu Agency (AA).

Во соопштението што го објави руското Министерство се негира Извештајот на Истражувачката група во кој се тврди за вмешаност на руските единици во периодот кога се случила трагедијата, но и потоа.

Во соопштението се вели „Ниту еден ракетен систем на Руските вооружени сили никогаш не ја минал руско-украинската граница.“

Освен тоа, во соопштението се вели дека руската страна до истражувачкиот тим приложила докази дека во случајот е вмешан украински проектил.

Меѓународниот истражувачки тим (JIT) објави дека авионот на „Malaysia Airlines“ (Малезија ерлајнс) MH17 се урнал, бидејќи бил погоден од руски проектил.

Авионот на „Malaysia Airlines“ MH17, кој сообраќаше на линијата Амстердам - Куала Лумпур со 283 патници и 15 членови на персоналот, на 17 јули 2014 година се урна во украинскиот воздушен простор на 40 километри од украинско-руската граница. Во несреќата животот го загубија сите 298 лица кои се наоѓаа во авионот.