Русија и Сирија разговараат за воени објекти, соработка во нафтениот и енергетскиот сектор

ИСТАНБУЛ (АА) - Русија и Сирија разговараат за присуството на Москва во земјата, вклучително и за можноста за реорганизација на руските воени објекти, соопшти Министерството за надворешни работи вчера, додека двете страни се стремат да соработуваат на проекти за нафта, енергија и реконструкција, известува Анадолу.

Портпаролката на Министерството за надворешни работи, Марија Захарова, изјави дека дискусиите за ова прашање се водат како дел од широка билатерална агенда.

„Нашата билатерална агенда со Сирија опфаќа широк спектар прашања поврзани со руско-сириската соработка. Исто така, се дискутира и за нашето воено присуство во Сирија, вклучително и во контекст на евентуалното реструктурирање на руските воени објекти. Секако, ваквите прашања и контакти се водат зад затворени врати“, изјави Захарова за новинарите.

Таа истакна дека руското Министерство за одбрана е главниот орган одговорен за ваквите прашања.

„Рековме сè што можевме за ова прашање. Дијалогот, вклучително и меѓу воените оддели на двете земји, ќе продолжи и ќе ве информираме што е можно поскоро“, додаде таа.

Русија одржува два клучни воени објекти во Сирија - логистичката база на морнарицата во пристанишниот град Тартус и воздухопловната база Хмејмим во покраината Латакија.

Вицепремиерот Александар Новак изјави дека Москва е подготвена да учествува во развојот на нафтените полиња во Сирија и да ја прошири соработката во енергетиката и реконструкцијата, по разговорите меѓу претседателот Владимир Путин и сирискиот привремен претседател Ахмад ал-Шара во Москва.

„Руските компании работат во Сирија долго време, на нафтените полиња: има полиња кои бараат развој, некои кои чекаат на употреба, а има и нови полиња. И ние сме подготвени да учествуваме“, изјави Новак за новинарите, кој беше цитиран од државната новинска агенција Тас.

Тој рече дека разговорите меѓу претседателот Владимир Путин и сирискиот претседател Ахмад ал-Шара - кој вчера ја оствари својата прва официјална посета на Русија - се фокусирале на заедничките проекти и обновување на транспортната и енергетската инфраструктура на Сирија.

„Генерално се согласуваме дека Сирија во моментов има потреба од реконструкција. Тие имаат многу уништена инфраструктура: енергетска, железничка и транспортна инфраструктура. И Русија може да обезбеди поддршка тука“, рече тој.

Новак додаде дека било разговарано за хуманитарните залихи, велејќи: „Особено, сириската страна е заинтересирана за добивање пченица, храна и лекови. Ќе се работи на овие прашања“.

Тој рече дека двете страни се согласиле да свикаат состанок на меѓувладина комисија „во блиска иднина“ за да разговараат за трговската, економската и инвестициската соработка, вклучувајќи проекти во енергетиката, транспортот, здравството, туризмот и културата.

„Нашите компании се заинтересирани за развој на транспортната инфраструктура и обновување на енергетскиот сектор“, рече Новак, додавајќи дека руските фирми планираат да користат домашна опрема во реконструкцијата на Сирија.