Betül Yürük
20 Октомври 2022•Ажурирај: 21 Октомври 2022
ОБЕДИНЕТИ НАЦИИ (АА) - Заменик-амбасадорот на Русија во Обединетите нации (ОН) изјави дека не е оптимист во врска со продолжувањето на договорот постигнат со посредство на Туркије и ОН, за извоз на жито и ѓубрива од Украина, јавува Агенција Анадолија (АА).
„Зависи што ќе добиеме од овој договор. Досега добивме многу малку“, изјави Дмитриј Полјански за АА. „Не би бил премногу оптимист во оваа фаза.“
„Работите што ни беа ветени не се имплементираат... Ние сакаме нашиот дел од договорот да се имплементира“, рече тој.
Руските власти се пожалија дека санкциите од Западот индиректно го попречуваат извозот на жито и ѓубрива во земјата, и покрај договорот.
„Има индиректни ефекти од санкциите. Има преголема претпазливост од западните компании и постои јасното немање желба од страна на западните земји да ја поправат оваа ситуација“, рече Полјански.
Договорот беше потпишан на 120 дена и истекува во ноември.
Обединетите нации бараат продолжување и проширување на Договорот за извоз на жито од Украина за една година.
Портпаролот на ОН, Стефан Дужарик, на 17 октомври истакна дека ќе продолжат разговорите за продолжување и проширување на договорот за жито, познат и како Црноморска иницијатива за жито.
Туркије, ОН, Русија и Украина потпишаа историски договор на 22 јули за повторно отворање на трите украински пристаништа Одеса, Черноморск и Јужни, за извоз на жито кој беше блокиран со месеци поради Руско-украинската војна, со цел решавање на глобалната криза во храна.
Полјански, исто така, се осврна и на тврдењата дека Русија користи беспилотни летала произведени од Иран во Украина и рече дека Москва ќе ја преиспита својата соработка со генералниот секретар на ОН, Антонио Гутереш, доколку тој испрати експерти во Украина да ги проверат пронајдените беспилотни летала за кои Украина и Западот велат дека се од иранско производство.
Украинскиот амбасадор во ОН, Сергиј Кислица, ги обвини Иран и Русија во писмо испратено до Советот за безбедност на ОН дека ги прекршуваат санкциите на ОН поради примањето на Москва испораки на беспилотни летала „камиказе“ од иранско производство откако Киев беше цел на серија напади и ги покани експертите на ОН да ја посетат Украина за да извршат инспекција на соборените беспилотни летала.
