Русија: Украина има нов предлог кој отстапува од одредбите на состанокот во Истанбул

МОСКВА (АА) - Министерот за надворешни работи, Сергеј Лавров, денеска ја обвини Украина дека претставила нов „нарушувачки мировен предлог“, прекршувајќи ги условите постигнати на состанокот во Истанбул минатата недела, пренесува Агенција Анадолија (АА).

„Новиот предлог беше презентиран вчера пред преговарачката група“, рече Лавров во видеоизјава објавена на веб-страницата на руското Министерство за надворешни работи.

„Вчера украинската страна ѝ го претстави на преговарачката група својот нацрт-договор, кој е очигледно нарушување на најважните принципи утврдени на состанокот на 29 март во Истанбул, напишани на документ, потпишан од [Давид] Арахамија, претставникот на украинската делегација“, рече Лавров.

Тој додаде дека во документот од Истанбул, украинската страна јасно прифатила дека предложените идни безбедносни гаранции нема да го покриваат Крим или Севастопол. Тие две територии беа преземени под руска контрола во 2014 година, потег кој никогаш не беше признаен од меѓународната заедница.

„Во вчерашниот документ, оваа јасна изјава [од 29 март] ја нема, а наместо тоа се предлага двосмислена формулација за одредена „ефикасна контрола“ од државата од 23 февруари“, денот пред Русија да ја започне војната.

„Исто така, Украина предложи разговори за прашањата за Крим и Донбас на состанокот на претседателите“, продолжи тој.

Пред војната, Русија призна две отцепени енклави во источниот украински регион Донбас како „независни“. Од 2014 година, регионот е зафатен со конфликт со проруските сепаратисти.

„Ние се сеќаваме како украинскиот претседател [Владимир] Зеленски многупати тврдеше дека такво нешто [разговори] е можно само по завршувањето на агресијата“, рече Лавров.

„Многу е веројатно дека во наредната фаза, украинската страна ќе бара повлекување на војниците и ќе продолжи со зголемување на условите. Овој план е јасен и е неприфатлив“, истакна тој.

- „Вистинскиот план на Украина е да ги одложи и наруши преговорите“ -

Лавров рече дека по состанокот во Истанбул, како одговор на „растечкиот реализам“ во позицијата на Украина, Русија спроведе деескалација во регионите на главниот град Киев и на Чернихив како знак за добра волја за да помогне во постигнувањето на преговорите.

Западните земји ги оспорија тврдењата на Русија за деескалација, велејќи дека наместо тоа, војниците биле прераспоредени на друго место.

Осврнувајќи се на сцените на маскарите на цивилите во градот Буча во близина на Киев, кои доведоа до широкораспространета осуда, Лавров продолжи: „Како одговор имаме провокација во Буча, која веднаш беше искористена од Западот за да најави нов пакет санкции и злосторства против руските воени затвореници од страна на украинските неонацисти.“

„Друга измена во Нацрт-мировниот договор се однесува на неутралниот, ненуклеарен статус на Украина“, рече Лавров, „заедно со неопходноста да се согласат земјите гаранти да одржуваат воени вежби со учество на странски војници.“

Тој вели дека во вчерашниот Нацрт-договор, тој „недвосмислен термин е заменет, сега се споменува можноста за одржување вакви вежби доколку мнозинството земји гаранти го одобрат тоа, без никакво споменување на Русија“.

„Ваквите потези го покажуваат вистинскиот план на Киев да ги одложи и наруши преговорите преку отстапување од веќе постигнатите договори“, рече Лавров.

„Во ова го гледаме откривањето на фактот дека режимот на Киев е контролиран од Вашингтон и неговите сојузници, кои го поттикнуваат Зеленски да продолжи со конфликтот“, заклучи рускиот министер.