САД првпат потврдија дека распоредиле оружје во вселената

САД првпат јавно потврдија дека распоредиле оперативно оружје во орбитата на Земјата, што претставува историски пресврт во однос на транспарентноста на Вашингтон во врска со неговите воени способности во вселената, јавува Анадолу.

„Денес продолжуваме да обезбедуваме дека сме подготвени да одговориме на предизвикот од заканите што се развиваат, каде и да се појават“, изјави вчера секретарот на американските воздухопловни сили Трој Мејнк на Конференцијата за воздухопловство, вселена и кибербезбедност во сојузната држава Мериленд, во близина на Вашингтон.

„Токму затоа Вселенските сили сега имаат оружја за контрола на вселената во орбитата, способни да ги бранат здружените сили од непријателски дејства на противниците.“

Мејнк, чиј ресор ги надгледува и американските воздухопловни сили и Вселенските сили на САД, одби да го открие датумот на оперативното распоредување, способностите на системите или дали вселенското оружје се потпира на кинетички ударни средства, насочена енергија или механизми за електронско и кибервојување.

По своето обраќање Мејнк пред новинарите изјави дека јавното признание било намерно и дека терминологијата била „многу внимателно осмислена“, со цел да се зајакне военото одвраќање, објаснувајќи зошто дополнителните детали остануваат доверливи.

„Разговорот за деталите за тоа што го правиме всушност нема да придонесе за тоа одвраќање“, рече тој.

„Нема да зборуваме за конкретни детали за тоа што го правиме, дали сме тестирале, не сме тестирале или нешто друго. Само би рекол дека вселенската средина е од клучно значење за воената и економската безбедност и дека треба да се осигуриме дека САД може слободно да дејствуваат таму.“

„Од клучно значење е да ја задржиме нашата доминација, не само во воздухот туку и во вселената“, додаде Мејнк. „Затоа моравме да преземеме чекори за да се осигуриме дека, кога сме загрозени, може да се справиме со тоа.“

Објавувањето на информацијата доаѓа во услови на зголемена воена конкуренција во орбитата меѓу САД, Кина и Русија, кои развија способности за дејствување против вселенски системи.

Тоа се случува и во време на напорите на администрацијата на Трамп за изградба на противракетниот одбранбен систем „Златна купола“, за кој се очекува да опфати сензори и пресретнувачи лоцирани во вселената, способни да детектираат и уништуваат ракети во различни фази од нивното летање.

Договорот за вселената од 1967 година забранува поставување нуклеарно оружје и друго оружје за масовно уништување во орбитата, но експлицитно не забранува конвенционално оружје во вселената.

Експерти за безбедност предупредуваат дека јавното потврдување на распоредувањето би можело да ги поттикне соперничките сили да ги прошират сопствените арсенали во орбитата, забрзувајќи ја трката во вооружување во простор што станува сè поважен за комуникациите, навигацијата, собирањето разузнавачки информации и воените операции.