Саудиска Арабија: Во пожар во фабрика за мебел загинаа 16 државјани на Бангладеш

Hајмалку 16 бангладешки работници мигранти загинаа во пожарот што вчера избувна во фабрика за мебел во главниот град на Саудиска Арабија, Ријад, соопшти Министерството за благосостојба на иселениците и вработување во странство, повикувајќи се на саудиската противпожарна служба, јавува Анадолу.

Министерот за благосостојба на иселениците и вработување во странство, Арифул Хак Чоудхури, изрази шок и жалење поради смртта на работниците.

Според Министерството, десет од загинатите се од северниот округ Наоган во Бангладеш, а другите се од северниот и западниот округ Наторе и Раџшахи.

„Таквата трагична смрт на иселениците што работат во далечната Саудиска Арабија во потрага по егзистенција е исклучително потресна. Нивниот придонес за економијата на земјата е огромен“, рече Чоудхури во соопштението.

Тој додаде дека Амбасадата на Бангладеш во Саудиска Арабија одржува деноноќен контакт со местото на несреќата и локалните власти. Надлежните службеници добиле инструкции да го забрзаат враќањето на посмртните останки на загинатите во земјата и да ги обезбедат потребната владина помош и надоместокот за нивните семејства.

Министерството за надворешни работи на Бангладеш соопшти дека внимателно ја следи ситуацијата и ја обезбедува потребната помош.

Службеници од Амбасадата на Бангладеш во Ријад пристигнале на местото на несреќата и соработуваат со надлежните саудиски власти во идентификувањето на загинатите и завршувањето на потребните формалности за враќање на нивните посмртни останки.

Саудиска Арабија останува најзначајна дестинација за бангладешките работници мигранти, при што околу 3,5 милиони граѓани на Бангладеш живеат и работат во кралството.

Бангладешките работници мигранти минатата година пратиле повеќе од 2,7 милијарди долари дознаки, при што најголем дел од нив биле вработени на работни места за кои не се потребни високи квалификации.