Силите на ЕУ се качија на брод за кој се смета дека е дел од руската „флота во сенка“ во Средоземното Море

Силите на Европската Унија (ЕУ) се качиле на танкер за нафта во Средоземното Море, поради верување дека е дел од руската „флота во сенка“, заради проверка на знамето, соопшти денес шефицата за надворешна политика на ЕУ, Каја Калас, јавува Анадолу.

Калас изјави дека на бродот „МВ САН“ се качиле припадници на поморската мисија на ЕУ во Средоземното Море, операцијата ИРИНИ, поради сомневања дека пловел под лажно знаме, со што го прекршувал меѓународното поморско право.

„Нелегалната продажба на нафта од бродовите на флотата во сенка е клучна линија за снабдување на Русија за нејзината војна во Украина и ќе продолжиме да ја прекинуваме“, напиша Калас на американската платформа за социјални медиуми Х.

Таа додаде дека „МВ САН“ е шестиот брод од флотата во сенка на кој силите на ЕУ се качиле во рамки на операциите во изминатите неколку месеци.

Според Калас, мерките насочени кон руската флота во сенка ќе бидат разгледани утре, кога министрите за одбрана на ЕУ ќе се состанат во Ирска.