БРИСЕЛ (АА) - Генералниот секретар на НАТО, Јенс Столтенберг, коментирајќи ги придонесите на Турција за Сојузот, нагласи дека сојузниците на НАТО се солидаризираат со Турција бидејќи таа се соочува со сериозни безбедносни предизвици, јавува Anadolu Agency (AA).
Столтенберг одговараше на прашањата на новинарите на Anadolu Agency во Брисел, пред неговата посета на Турција во текот на наредните два дена. Тој ќе претседава со состанокот на Северноатлантскиот совет со партнерите од Медитеранскиот дијалог во главниот град Анкара. Столтенберг ќе одржи состаноци и со високи официјални претставници на Турција.
Говорејќи за широкиот спектар на теми, вклучувајќи ја и агендата на неговата посета, купувањето на воздушниот и ракетен одбранбен систем S-400, придонесот на НАТО во Турција, Столтенберг ѝ се заблагодари на Турција за организирањето на специјалниот состанок на Северноатлантскиот совет во врска со 25-годишнината од Медитеранскиот дијалог (MD).
- Сојузниците на НАТО се солидаризираат со Турција -
Anadolu Agency: Која е целта на Вашата посета на Турција? Со кого ќе остварите официјални состаноци? Која ќе биде главната порака што сакате да ја пренесете до турските власти?
Столтенберг: Ми претставува задоволство што повторно сум во посета на Турција, важен и високо ценет сојузник на НАТО. Благодарен сум на Турција што е домаќин на специјалниот состанок на Северноатлантскиот совет, највисокото тело на НАТО за донесување одлуки, со нашите седум земји партнери во нашиот Медитерански дијалог. Оваа година ја славиме 25-годишнината од овој дијалог, кој е единствена мрежа на партнерите на НАТО, промовирајќи заедничко разбирање и соработка.
Како и овој важен состанок во Анкара, ќе имам разговори со претседателот Реџеп Таип Ердоган и со министерот за надворешни работи, Мевлут Чавушоглу. Јас сум во редовен контакт со нив, и ја поздравувам можноста да разговарам лично за безбедносната ситуација во регионот и за силните придонеси на Турција во НАТО.
Мојата главна порака до целиот народ во Турција е дека НАТО се солидаризира со Турција, бидејќи таа се соочува со сериозни безбедносни предизвици и затоа што продолжува да прави значајни придонеси за нашата Алијанса.
- Одлуките за воено снабдување треба да ги донесат нациите -
Anadolu Agency: Одлуката на Турција за купување на воздушниот и ракетен одбранбен систем S-400 предизвика многу контроверзии, особено меѓу двата сојузника на НАТО, САД и Турција. Турција неодамна наиде на голем број критики. За возврат, турската Влада укажа на тоа дека се обидува да ги задоволи своите итни потреби во воздушната и ракетната одбрана, пред сѐ преку своите сојузници на НАТО, како што е американскиот систем „Patriot“. Таа тврди дека понудата од САД дошла многу доцна, дека понудената цена е многу висока и дека не ги задоволува очекувањата на Турција. Во врска со ова, дали мислите дека Турција ги заслужува добиените критики за купување на S-400? Кој е Вашиот став?
Столтенберг: Ова е предизвикувачко прашање и важно е дека постои постојан дијалог меѓу Турција и САД.
Ги поздравувам и ги охрабрувам дискусиите за евентуално купување на американскиот ракетен систем „Patriot“, а исто така, го поздравувам тоа што Турција, Франција и Италија ги продолжуваат напорите за дефинирање и развој на воздушниот и ракетен одбранбен систем од долг дострел. Ова е важно за НАТО, бидејќи клучните сојузници се вклучени и затоа што ги охрабруваме сојузниците да купуваат опрема со која што може да работат заедно.
Одлуките во врска со военото снабдување треба да ги донесат нациите. Но како што реков, интероперабилноста на нашите вооружени сили е од суштинско значење за НАТО за спроведување на нашите операции и мисии.
Ние, исто така мора да се потсетиме дека од 2013 година сојузниците на НАТО се обидуваат да ја зајакнат воздушната одбрана на Турција. Шпанија и Италија имаат ракетни батерии распоредени во близина на јужната граница на Турција. Нивните системи „Patriot“ и SAMP-T ѝ помагаат на Турција во одбрана против заканите од ракети од границата со Сирија. Оваа мисија е важна и сојузниците на НАТО се посветени кон тоа.
- НАТО е посветен во одбраната на Турција -
Anadolu Agency: Дебатата за S-400, исто така, се одрази врз турското јавно мислење, што доведе до голем број прашања за придонесот на НАТО кон одбраната и безбедноста на Турција и членството на Турција во НАТО. Каква е Вашата порака до турскиот народ за придонесот на НАТО кон безбедноста на Турција?
Столтенберг: Сојузниците на НАТО се заедно со Турција додека се соочувате со сериозни безбедносни предизвици. Паралелно со заштитата на Турција со воздушни и ракетни одбранбени системи, НАТО ги зголеми патролите на извидувачките авиони AWACS над турската територија. Тие можат да ги следат и да влезат во трага на потенцијалните прекршувања на воздушниот простор, поддржувајќи ги напорите на Турција за одбрана на воздушниот простор. Сите сојузници на НАТО се членки на Глобалната коалиција за борба против ДЕАШ и работејќи заедно, ја ослободивме целата територија што некогаш беше под контрола на оваа терористичка група. Новата мисија на НАТО за обука во Ирак, исто така, помага да се зголеми стабилноста во регионот. На минатомесечниот состанок на министрите за надворешни работи во Вашингтон, исто така, се согласивме со пакет на можни акции за подобрување на безбедноста во регионот на Црното Море. Сево ова ја покажува посветеноста на НАТО кон одбраната на Турција.
Турција, која граничи со Ирак и Сирија, е сојузник кој најмногу е изложен на насилство и немири од Блискиот Исток. Нашата земја, исто така, претрпе голем број ужасни терористички напади. Сите сојузници на НАТО се заедно во својата посветеност во борбата против тероризмот во сите форми.
- Високо го ценам сето тоа што Турција го прави за НАТО -
Anadolu Agency: Како Турција дава придонес во НАТО? Која е вредноста на Турција за НАТО?
Столтенберг: Сакам да ѝ се заблагодарам на Турција за суштинскиот придонес што го давате за нашата заедничка безбедност.
Со поддршка на турската Влада, извидувачките авиони AWACS на НАТО од Коња летаат во поддршка на Глобалната коалиција за борба против ДЕАШ. Турција, исто така игра значајна улога во новата мисија на НАТО за обука во Ирак. Ги зајакнува ирачките безбедносни сили со цел да помогне да се осигури дека ДЕАШ нема да се врати повторно.
Турција, исто така е една од земјите кои даваат најголем придонес во мисијата „Решителна поддршка“ (Resolute Support Mission) во Авганистан, помагајќи да се осигура земјата да не биде повторно рај за меѓународните терористи. Турција помага во градењето на стабилноста на Западен Балкан, како дел од мировната операција на НАТО во Косово.
Турција во Алијансата се вклучи во 1952 година, и продолжи да биде високоценета членка на нашето семејство на нации. Како генерален секретар, високо го ценам сето тоа што Турција го прави за нашата Алијанса.
- НАТО ќе остане столб на стабилноста -
Anadolu Agency: НАТО одбележа 70 години од своето постоење како најуспешна и најиздржлива воена алијанса во историјата. Според Ваше мислење, кои се главните силни страни и слабости на НАТО? Каде НАТО треба да се фокусира во блиска иднина, во насока на сложените безбедносни закани?
Столтенберг: За 70 години, НАТО ги заштити нашите земји и народи преку тоа што постојано се адаптираше на новите безбедносни предизвици. За време на Студената војна, НАТО успешно го одврати Советскиот Сојуз од агресија. Во 1990-тите години, ние се соочивме со нови безбедносни предизвици во Европа, и помогнавме во ставањето крај на конфликтите на Западен Балкан. По 11 септември, НАТО презеде водечка улога во меѓународниот одговор во Авганистан, каде што продолжуваме да ги обучуваме локалните сили.
Денес и повеќе години наназад ние се соочуваме со најнепредвидливи безбедносни ситуации, вклучувајќи ја нестабилноста на Блискиот Исток и Северна Африка, понаметливата Русија, хибридните и киберзаканите, и терористичките закани кои продолжуваат. Како одговор на тоа, НАТО презеде одговорност и во исто време одговори на бројни предизвици.
Ние го засиливме нашето присуство, вклучувајќи го и регионот на Црното Море. Ја зголемивме подготвеноста на нашите сили и издржливоста против хибридни и киберзакани, држејќи ги отворени каналите за дијалог со Русија. Ја зголемивме нашата улога во борбата против тероризмот, давајќи придонес во Глобалната коалиција за борба против ДЕАШ, со извидувачки летови и обуки во Ирак.
Светот се менува, и НАТО се менува со светот. Но некои нешта остануваат неменливи: нашата посветеност едни кон други е постојана, давајќи ни сила да ги надминеме нашите разлики и да му одговориме на секој предизвик. НАТО ќе остане столб на стабилноста во неизвесниот свет за идните генерации.
