Стотици студенти на францускиот „Сајанс По“ на протест за поддршка на Палестина

СКОПЈЕ (АА) - Стотици студенти на Универзитетот „Сајенс По“ во Париз, Франција, организираа протест, окупирајќи делови од главниот кампус на универзитетот во знак на револт поради врските на институцијата со израелските академски институции при тековниот конфликт во Газа, јавува Анадолу.

Демонстрантите се собраа и внатре и надвор од зградата, носејќи транспаренти и палестински знамиња, извикувајќи слогани како „Палестина ќе победи“ и „Да живее Палестина“.

Некои студенти ги обоија рацете во црвена боја за да го симболизираат крвопролевањето во Газа, а со транспарентите го обвинија универзитетот за соучесништво во она што демонстрантите го нарекоа „геноцид“.

Маскиран портпарол ја повика администрацијата да ги прекине врските со израелските универзитети, поточно Универзитетот во Тел Авив поради неговата наводна поврзаност со израелските воени операции.

Израел ја продолжи својата офанзива во Појасот Газа на 18 март прекршувајќи го договорот за прекин на огнот и размена на затвореници што стапи на сила во јануари. Од октомври 2023 година досега во енклавата се убиени речиси 51.400 Палестинци, повеќето жени и деца.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата поради воените дејства што ги доведоа луѓето на територијата на раб на глад.