ТУНЏЕЛИ (АА)
– Сидар ЏАН ЕРЕН
Со доаѓањето на пролетта во турската област Тунџели, љубителите на природата почнаа да организираат патувања до висорамнините, водопадите и езерата во местата Оваџик и Пулумур, кои се опкружени со снежни планини.
Центарот на областа и неговата околина, поставени меѓу стрмни планини, го привлекуваат вниманието на посетителите со нивното природно, историско и културно богатство.
Местата Оваџик, Пулумур и Назимије се издвојуваат по својата природа, додека Мазгирт, Хозат, Чемишгезек и Пертек се издвојуваат со своите историски локалитети.
Во градот, кој секоја година пречекува голем број посетители, го красат Националниот парк „Долината Мунзур“, тврдината Пертек, дупките кај Чемишгезек, Караѓол, висорамнината Елмали, езерото Бујер, водопадот Дереова, Мунзур Ѓозелер и Карпите што плачат.
Местата Оваџик и Пулумур, кои даваат значаен придонес во екотуризмот, се меѓу најпосетуваните места од страна на туристите, особено во периодот мај - септември.
Во овие области, каде што зимската сезона е сурова, со доаѓањето на пролетта зазеленуваат дабовите шуми, кои заедно со дивите цвеќиња и водопадите нудат убавини вредни за гледање.
Висорамнините кои со своите снежни врвови во областа нудат поинаква убавина, се исто така на рутата на голем број љубители на природата од околните места и области.
Посетителите кои поминуваат низ стрмните и тешки патеки за да стигнат до висорамнините со надморска височина од 3.000, уживаат во околината испреплетена со пролетен и зимски пејзаж и изработуваат фотографии.
Џанер Џанерик, писател и љубител на природата кој живее во Пулумур, за АА изјави дека не може да се насити од убавината на природата што заживува по тешката зима во Тунџели.
Наведувајќи дека градот се издвојува со природните, историските и културните убавини, Џанерик изјави дека меѓу стрмните планини во регионот има многу неистражени места.
Објаснувајќи дека во последниве години, за љубителите на природата често се организираат тури во градот, Џанерик рече: „Областите Пертек и Чемишгезек се издвојуваат со своите историски локалитети, додека другите места се издвојуваат со својата природа. Градот го красат долгите зимски и есенски периоди. По сувата зима, боите на дрвјата и природата во регионот создаваат рајска атмосфера.“
Адвокатката Бану Чукадар Јилмаз, една од посетителите на областа, рече дека дошла од Ерзинџан да ги посети селото Коџатепе и висорамнината Сариѓул во Тунџели.
Изразувајќи дека е воодушевена од планините и висорамнините во регионот, Јилмаз своите чувства ги изрази со зборовите:
„Овде планината, водата и небото создаваат посебно чувство. Времето овде е многу убаво. Затоа, во секоја пригода доаѓаме овде. Од друга страна, земањето здив покрај потоците Мунзур и Пулумур дава поинакво чувство. Во овдешната природа чувствувам дека дишам.“
