Украина го повика светот да ја спречи Русија од користење уцени и закани

КИЕВ (АА) - Украинскиот Парламент, Врховната Рада, ја повика меѓународната заедница да ја спречи Русија од користење уцени и закани за целосна инвазија врз земјата, јавува Агенција Анадолија (АА).

Пратениците се состанаа со оваа агенда во услови на континуирани тензии меѓу Русија и Украина.

За време на седницата на Парламентот беше донесена резолуција за апел до Обединетите нации, Европскиот парламент, владите и парламентите на странски држави и меѓународни организации да ја спречат Русија да продолжи со воената уцена против Украина, која е неправедна и е со цел да се спречи спроведувањето на европските и евроатлантските аспирации на Украина.

Резолуцијата беше усвоена со гласовите на 282 од вкупно 319 пратеници.

Парламентот, исто така, повика на употреба на сите можни дипломатски средства за да се овозможи деескалација на ситуацијата и повлекување на руските трупи од границите на Украина.