УНИЦЕФ: Неразбирливо е убиството на повеќе од 45 деца во Газа за два дена

ОБЕДИНЕТИ НАЦИИ (АА) - Кетрин Расел, извршната директорка на Детскиот фонд на Обединетите нации (УНИЦЕФ), реагираше на убиството на повеќе од 45 деца во Газа за два дена, нарекувајќи го „несфатливо“, известува Анадолу.

Во објавата на својот профил на социјалната мрежа X, Расел повика на „крај на ужасот“ што продолжува во Газа.

Посочувајќи на тековните воздушни напади на Израел врз Газа, Расел рече: „Несфатливо е што повеќе од 45 деца се убиени во воздушните напади во Газа за два дена. Ова би требало да го шокира светот, но на ова во голема мера се гледа рамнодушно.“

Нагласувајќи дека ниту едно место не е безбедно за децата во Газа, директорката на УНИЦЕФ во својата објава додава:

„Овој ужас мора да заврши“.

Во друга објава истиот ден, Расел напиша: „Повеќе од 1 милион деца во Газа се изложени на ризик од глад. Тие се лишени од храна, вода и лекови“, и ги повика сите страни во конфликтот да го почитуваат меѓународното хуманитарно право.

- Израелската Армија продолжува со нападите врз Газа прекршувајќи го прекинот на огнот

По воведениот прекин на огнот на 19 јануари во Појасот Газа, израелската Армија утрото на 18 март ги продолжи своите жестоки напади.

Од продолжувањето на нападите на Израел врз Газа убиени се 2.876 Палестинци, претежно постари лица, жени и деца, а 7.957 се повредени.

Бројот на Палестинци убиени во израелските напади врз Појасот Газа од 7 октомври 2023 година се зголеми на 53.010, а бројот на повредени изнесува 119.998.