Шкотска, Северна Ирска и Велс потпишаа значајна декларација за самоопределување

Лидерите на Шкотска, Северна Ирска и Велс денес потпишаа значаен меморандум за разбирање, повикувајќи ја Владата на Обединетото Кралство да се подготви за уставни промени, јавува Анадолу.

Во заедничката декларација, потпишана од Рун ап Јорверт, прв министер на Велс и лидер на партијата Плаид Кимру; Џон Свини, прв министер на Шкотска и лидер на Шкотската национална партија (СНП) и Мишел О'Нил, прва министерка на Северна Ирска и потпретседателка на партијата Шин Фејн, се наведува дека политичкиот пејзаж „се менува“.

„Секоја од нашите земји има право сама да ја одредува својата иднина, преку демократски средства и во согласност со желбите на својот народ“, се истакнува во документот.

Лидерите изјавија дека веруваат оти „иднината на нашите земји е во Европската Унија“, додавајќи дека првпат во историјата првите министри на Шкотска, Велс и Северна Ирска се луѓе што сите се залагаат за независност од Обединетото Кралство“. Истакнувајќи дека Брегзит им нанел штета на нивните економии и ги ограничил можностите за нивните граѓани, во декларацијата се нагласува дека лидерите сакаат да соработуваат за да ги обноват и зајакнат тие европски односи, создавајќи поголеми можности за трговија, инвестиции, култура и соработка.

Во заедничката декларација се наведува: „Нашите земји имаат право на самоопределување.“

„Ја повикуваме британската Влада да се подготви, да планира и да овозможи уставни промени во секоја од јурисдикциите“, се наведува во декларацијата.

Во неа се додава дека ниедна влада во Вестминстер „нема право да ја попречува демократијата или да го поткопува“ принципот според кој трите земји сами ќе одлучуваат за својата иднина.

„За луѓето што нè следат низ овие острови – и за оние низ светот – не може да има појасен знак дека времето на Вестминстер се ближи кон крајот“, истакнаа лидерите.

Понатаму се наведува: „Она што нè обединува е решителноста да обезбедиме гласовите на нашите земји да се слушнат, нашите луѓе да имаат можност за напредок, а соработката меѓу Шкотска, Велс и Ирска да се зајакне.“

- Декларацијата следува по изјавите на американскиот претседател за „обединета Ирска“ -

Декларацијата беше објавена по првата средба во живо меѓу тројцата лидери, одржана претходно денес во Кардиф, главниот град на Велс.

Првпат откако започна процесот на деволуција во 1997 година, сите три земји имаат први министри што сакаат да го напуштат Обединетото Кралство.

Во изјавата за „Скај њуз“ пред средбата, О'Нил рече дека целокупниот политички пејзаж „значително се менува“, додавајќи дека обединувањето на Ирска е „сериозно на дневен ред“.

Ова следува откако американскиот претседател Доналд Трамп изјави дека интегрирањето на Ирска и Северна Ирска претставува „еден од најприродните потези на сите времиња“, сугерирајќи дека историските поделби треба да се надминат.

Овие изјави дојдоа по коментарите што тој ги даде во саботата додека престојуваше во Ирска, кога рече дека би сакал Ирска да ја види обединета.

„Променливиот политички пејзаж на овие острови“ значи дека постојат силни аргументи за „практична политичка соработка“ во области како што се енергетиката, економијата и соработката со Европа, изјави портпаролот на партијата Плаид, пренесе Би-би-си.

Во меѓувреме, лидерот на СНП, Свини, изјави дека трите партии го делат ставот „народите на нашите соодветни земји мора да можат сами да ја обликуваат својата иднина“.

„Во овој клучен момент на уставни промени, ние ќе го продлабочиме нашето партнерство“, напиша тој на американската платформа за социјални медиуми Х.