Во стампедо на фудбалски стадион во Гвинеја загинаа над 50 лица

КИГАЛИ (АА) - Најмалку 56 лица загинаа, а повеќемина се повредени за време на насилството и стампедото на фудбалски стадион во Југоисточна Гвинеја, соопшти Владата денес, јавува Анадолу.

Смртоносниот инцидент се случил вчера на финалниот натпревар на локалниот фудбалски турнир на стадионот во вториот по големина град во Гвинеја, Нзерекоре, на околу 570 километри од главниот град Конакри.

Премиерот Амаду Ори Бах изјави дека ќе се спроведе истрага за да се утврди одговорноста за инцидентот.

„Манифестирањето незадоволство од судиските одлуки доведе до фрлање камења од навивачите, предизвикувајќи смртоносно стампедо. Болничките служби известуваат дека моментниот биланс на загинати е 56 и неколкумина повредени“, се вели во соопштението.

Владата им оддаде почит на жртвите и изрази сочувство до семејствата на загинатите.

Претходно, во неофицијалните извештаи се вели дека бројот на загинати е околу 100.

Локалните медиуми објавија дека хаосот започнал во последните минути од натпреварот помеѓу фудбалскиот тим Лабе и тимот на Нзерекоре.

Играчите на фудбалскиот тим Лабе го оспорија голот постигнат од ривалскиот тим Нжерекоре, што доведе до судири меѓу навивачите на противничките екипи на стадионот.

Судиските одлуки со кои двајца играчи на Лабе добија црвени картони проследени со казна против овој тим, наводно, го предизвикале насилството.

Тоа беше последниот натпревар на турнирот спонзориран од претседателот на Гвинеја, генералот Мамади Думбуја.