Утре во Саудиска Арабија започнува Релито Дакар

ИСТАНБУЛ (АА) - Утре во Саудиска Арабија започнува Релито Дакар, кое се смета за една од најпредизвикувачките и најопасните трки во светот, јавува Анадолу.

47-то издание на Релито ќе започне со прелиминарната етапа во Биша и ќе заврши со етапата 12 во Шубајтах на 17 јануари.

Релито Дакар 2025 ќе има патека долга 5.209 километри, која ќе ги опфаќа бреговите на Арапскиот Полуостров, песочните дини, планините и пустината Руб ал Кали во текот на целиот натпревар.

- Дводневна маратонска етапа -

Слично како и минатата година, и ова издание на Релито ќе има дводневна маратонска етапа.

Возачите мора да стигнат до еден од шесте назначени кампови до 17:00 часот по локално време, за да преноќат во текот на втората етапа, која ќе трае два дена.

Со минимални одредби, возачите ќе го продолжат своето патување следното утро за да ги поминат преостанатите 965 километри од етапата.

- Петерхансел има најмногу првенства -

Французинот Стефан Петерхансел, со 14 титули на Релито Дакар - осум во автомобили и шест во мотоцикли - го држи рекордот за најмногу победи во натпреварувањето.

Минатата година, Шпанецот Карлос Саинц победи во категоријата автомобили, освојувајќи ја својата четврта титула, додека Рики Брабек од САД по втор пат триумфираше во категоријата мотоцикли.

Французинот Себастиен Леб, деветкратен победник на Светскиот шампионат во рели, повторно ќе се бори за титулата на Релито Дакар, од кое е дел од 2016 година.

Покрај Саинц, во категоријата автомобили ќе се натпреварува и Катарецот Насер ал-Атијах, додека во мотоциклистичката трка ќе учествуваат Брабец и поранешниот шампион Кевин Бенавидес од Аргентина.

- 33 возачи загинаа во предизвикувачките трки -

Од своето основање во 1979 година, на Релито Дакар 33 возачи ги загубија животите во различни несреќи за време на трките.

Покрај возачите, речиси 50 лица, новинари, организатори и гледачи - исто така ги загубија животите, иако точниот број не е познат поради нецелосни службени записи.

Тиери Сабине, основачот на Релито Дакар, трагично загина за време на настанот во 1986 година.