Џунејт Чакир ќе биде судија на реваншот помеѓу Ливерпул и Барселона

ИСТАНБУЛ (АА) - Еден од најдобрите европски фудбалски судии, Џунејт Чакир, ќе ја дели правдата на реваншниот полуфинален меч меѓу Ливерпул и Барселона, пренесува Anadolu Agency (AA).

Европската куќа на фудбалот УЕФА, денеска соопшти дека турскиот арбитер Чакир ќе го суди мечот кој ќе го играат Ливерпул и Барселона на стадионот „Енфилд роуд“ во вторник.

Чакир во изминатите девет сезони од Лигата на шампиони судеше во вкупно 44 натпревари, вклучувајќи и еден финален и шест полуфинални.

Помошници на Чакир ќе бидат Бахатин Дуран и Тарик Онгун, а Португалецот Артур Соарес Диас ќе биде четвртиот судија.

Во ВАР-собата како видеоасистенти ќе бидат германските судии Феликс Звајер и Саша Стегеман.

Дуелот помеѓу Барселона и Ливерпул во полуфиналето на Лигата на шампиони важи за финале пред финалето, а каталонскиот тим во првиот меч во средата на „Камп ноу“ победи со 3:0.

Ливерпул има многу тешка задача да го стигне заостанувањето во резултатот од првиот меч, а публиката очекува возбудлив меч на „Енфилд“.