Ердоган: Мрежата на геноцид заслепена од омраза ја користи верата како параван за продлабочување на регионалната криза

АНКАРА (АА) – Турскиот претседател Реџеп Таип Ердоган денес упати остри критики до израелската администрација, нарекувајќи ја „мрежа на геноцид заслепена од омраза“ поради нејзините дејства, која го влече регионот во најлошите превирања на векот, јавува Анадолу.

Војната започната против Иран продолжува да го затрупува регионот со „крв, барут“, а невини деца се цел на ракети додека се во училиште, изјави Ердоган пред обласните лидери на својата Партија на правдата и развојот (АК Партија) во Анкара, осврнувајќи се на бомбардираното училиште во Минаб, Иран.

„Владата на Нетанјаху не само што го таргетира Иран туку постепено спроведува и планови за инвазија на Либан“, предупреди тој.

„Турција не прави разлика меѓу своите браќа и соседи ниту, пак, стои настрана додека тие страдаат“, додаде Ердоган.

Во врска со одлуката на Израел да им забрани на муслиманите да ги извршуваат молитвите за Бајрам во џамијата Ал-Акса во Ерусалим, Ердоган рече дека спречувањето на молитвите за Бајрам во Ал-Акса, првпат од 1967 година, е „дрзок“ напад врз верата на две милијарди муслимани.

Правото на муслиманите да се молат во џамијата Ал-Акса не може да биде одземено, блокирано или забрането, „без оглед на изговорот“, додаде турскиот лидер, упатувајќи жестоки критики до израелската администрација.