Ердоган: „Туркије ќе продолжи да биде силен поддржувач на ОН“

АНКАРА (АА) - Како една од земјите што презема водечка улога во Обединетите нации (ОН), Туркије ќе продолжи да стои на страната за да ги поддржува и брани, изјави денес претседателот Реџеп Таип Ердоган, јавува Агенција Анадолија (АА).

„Туркије ќе продолжи да биде силен поддржувач и бранител на ОН, вредностите што ги претставуваат ОН и активностите на ОН“, рече Ердоган во изјавата по повод 77-годишнината од ОН и 24 октомври, Денот на Обединетите нации.

„Туркије е една од земјите што даде „најконкретен“ придонес и презеде водечки улоги во работата што се спроведува во рамките на ОН во областите на мирот и безбедноста, човековите права и одржливиот развој“, рече Ердоган.

„Ние како одговорна членка на меѓународната заедница ги предводиме напорите насочени кон спречување конфликти и одржување на стабилноста во нашиот регион и пошироко. Ги водевме испораките на украинско жито во светот преку Црното Море, преку интензивните напори што ги вложивме во соработка со генералниот секретар на ОН, Антонио Гутереш“, истакна турскиот претседател.

Во јули, Туркије, ОН, Русија и Украина потпишаа договор во Истанбул за обновување на извозот на жито од три украински пристаништа на Црното Море, кој беше прекинат од почетокот на руско-украинската војна во февруари.

По испорачувањето на над 8 милиони тони жито и други земјоделски производи, според договорот од Истанбул, кој наскоро ќе треба да се обнови, Ердоган рече дека Туркије ги продолжува на интензивен начин дипломатските разговори насочени кон непречено одвивање на испораката“.

Во областа на хуманитарната дипломатија, Ердоган нагласи дека Туркије, како најголем донатор на хуманитарна помош во светот, во однос на нејзиниот национален приход, игра активна улога и под покривот на ОН.

- „ОН треба да преземат поактивна улога во кризите“ -

Турскиот претседател, исто така, ја истакна потребата од реформи во Советот за безбедност на ОН за да се помогне да се постигне поправеден свет.

„Очигледно е дека ОН треба да преземат поактивна улога во решавањето на кризите кои секојдневно одземаат животи на илјадници невини луѓе и во обезбедувањето одржлив развој“, рече Ердоган.

Тој додаде дека „подемократски, потранспарентен, поактивен и поодговорен“ Совет за безбедност е очекување што го споделува меѓународната заедница.

„Дефинитивно треба да се зајакне Генералното собрание на ОН каде сите земји членки се подеднакво застапени и кое ја одразува заедничката волја на меѓународната заедница“, рече тој.

Турскиот претседател долго време ја критикуваше нерепрезентативната природа на петте постојани членки на Советот за безбедност, барајќи реформи под слоганот: „Светот е поголем од пет.“

Туркије се труди да ја подигне свеста за потребата од борбата против исламофобијата и културниот расизам, кои претставуваат закана за глобалниот мир и стабилност, рече Ердоган и додаде: „Ние ќе продолжиме со нашите напори и во рамките на ОН и на билатерално ниво со цел климата на омраза да не го труе општествениот мир“.