Турција со реакции на одлуката на Израел да ја прошири својата воена операција во Газа

АНКАРА (АА) - Министерството за надворешни работи на Турција објави соопштение во врска со одлуката на израелската Влада да ја прошири својата воена операција во Газа, во кое наведува: „Најостро ја осудуваме одлуката на Израел да ја прошири својата воена операција во Газа, што претставува нова фаза од неговата експанзионистичка и геноцидна политика во регионот“, известува Анадолу.

Турското МНР во писмено соопштение наведе дека секој чекор што го презема „фундаменталистичката“ Влада на израелскиот премиер Бенјамин Нетанјаху за продолжување на геноцидот врз Палестинците и проширување на окупацијата нанесува тежок удар врз меѓународниот мир и безбедност, ја зголемува регионалната нестабилност и дополнително ја продлабочува хуманитарната криза.

„Воспоставувањето траен мир во нашиот регион ќе биде можно само преку владеење на меѓународното право, приматот на дипломатијата и заштитата на основните човекови права. Окупаторскиот Израел мора веднаш да ги запре своите воени планови, да прифати прекин на огнот во Газа и да започне преговори за решение со две држави“, се вели во соопштението и се истакнува:

„Ја повикуваме меѓународната заедница да ги исполни своите одговорности за да го спречи спроведувањето на оваа одлука чија цел е насилно раселување на Палестинците од нивната сопствена земја и Газа да се направи несоодветна за живот и апелираме до Советот за безбедност на Обединетите нации (ОН) да усвои обврзувачки резолуции за да се спречат дејствата на Израел што ги прекршуваат меѓународното право и хуманитарните вредности.“