Ердоган и Зеленски разговараа за војната во Украина: Целта е што поскоро да се воспостави траен прекин на огнот

АНКАРА (АА) – Турскиот претседател Реџеп Таип Ердоган разговараше со својот украински колега Владимир Зеленски за актуелните случувања во војната меѓу Русија и Украина, јавува Агенција Анадолија (АА).

Од Дирекцијата за комуникации при Кабинетот на турскиот претседател се соопштува дека Ердоган во телефонскиот разговор со Зеленски истакна дека продолжувањето на војната во Украина не оди во ничиј прилог и дека целта е што поскоро да се постигне траен прекин на огнот.

Во соопштението се наведува дека Ердоган посочил дека Турција вложува интензивни напори на дипломатско поле за изградба на мир меѓу Русија и Украина.

Турскиот претседател Ердоган, исто така, најави дека ќе продолжи да вложува напори и во насока на организирање директен состанок и преговори меѓу рускиот претседател Владимир Путин и неговиот украински колега Зеленски.

Нагласувајќи дека Турција продолжува да испраќа хуманитарна помош за украинскиот народ и Украинците бегалци, Ердоган рече дека е од голема важност хуманитарните коридори да останат проодни и безбедни.