Muhammed Enes Çallı
12 Октомври 2023•Ажурирај: 13 Октомври 2023
ИСТАНБУЛ (АА) - Турскиот претседател, Реџеп Таип Ердоган, денес телефонски разговараше со неговиот колега од Обединетите Арапски Емирати (ОАЕ), шеикот Мухамед бин Зајед ал Нахјан, во врска со последните случувања во конфликтот меѓу Израел и Палестина, јавува Анадолу.
За време на телефонскиот разговор, Ердоган рече дека ставањето крај на тензиите меѓу Израел и Палестина е можно преку позитивни чекори што треба да ги преземе меѓународната заедница, особено земјите во регионот, соопшти Директоратот за комуникации при претседателството на Туркије.
Во услови на драматичната ескалација на тензиите на Блискиот Исток, израелските сили започнаа непрекината и силна воена кампања против Појасот Газа, како одговор на воената офанзива на палестинската група Хамас на израелските територии.
Конфликтот започна кога Хамас ја иницираше операцијата „Поплава Ал-Акса“ против Израел, ненадеен напад од повеќе страни, лансирање ракети и инфилтрации во Израел преку копно, море и воздух, за што Хамас рече дека е одмазда за рациите на џамијата „Ал-Акса“ во окупираниот Источен Кудс (Ерусалим) и растечкото насилство на еврејските доселеници врз Палестинците.
Како одговор на акциите на Хамас, израелската војска ја започна операцијата „Железни мечеви“ против позициите на Хамас во Појасот Газа.
Одговорот на Израел се прошири во прекин на снабдувањето со вода и електрична енергија во Газа, дополнително влошувајќи ги условите за живот во областа која е под строга опсада од 2007 година.
