ХАТАЈ (АА)
- Фатих ЧАПКИН / Серген СЕЗГИН
На земјиштето што стана речиси непрепознатливо по разорните земјотреси што го потресоа Хатај на југот од Туркије, создаден е огромен расцеп што привлекува големо внимание, известува Анадолу.
Расцепот што настана во маслиновиот насад во руралниот дел на Тепехан по земјотресот, на некој начин стана еден од највпечатливите симболи што ја покажуваат сета сила на разорните земјотреси кои се именуваат како „катастрофа на столетието“.
Разорните земјотреси во маслиновиот насад на Омер Аксу, со големина од 12 декари (12.000 квадратни метри), формираа расцеп широк 200 метри, долг 400 метри и длабок 50 метри.
Ова подрачје по земјотресот го посетуваат домашни и странски научници, како и бројни љубопитни луѓе, сакајќи да се уверат во оваа необична појава.
Онер Аксу, сопственик на маслиновиот насад, за Анадолу изјави дека неговото земјиште пред земјотресот имало рамна структура на тлото.
Тој истакна дека поради јачината на земјотресот, земјиштето станало речиси непрепознатливо.
„Ова не е можно. Знам како изгледаше ова место. Не можев ниту да претпоставам дека вака ќе изгледа. Иако ова е мој имот, не можев да го препознаам местото. Ова беше рамно тло. Кога видов што се случило, не можев да поверувам. Со зборови не може да се опише што се случило тука“, рече Аксу.
Тој истакна дека сѐ уште е во шок кога ќе го погледне расцепот што настана во маслиновиот насад по земјотресот.
Аксу рече дека е длабоко потресен поради човечките жртви и разорувањата што ги предизвика земјотресот.
„Многумина останаа без кров над главата. И ние живееме во шатори. Сега го чувствувам и секој мал потрес. Неколкупати бев во обиколка на земјиштето каде што настана расцепот“, рече Аксу.
Тој напомена дека подрачјето привлекува сѐ повеќе посетители и љубопитни луѓе кои сакаат да го видат феноменот.
„Доаѓаат домашни и странски научници да вршат испитувања“, рече Аксу на крајот.
