Osman Öksüz,Halil İbrahim Sincar
08 Февруари 2023•Ажурирај: 09 Февруари 2023
МАРДИН (АА) - Татко и син се спасени од под урнатините на станбена зграда во Шанлиурфа, дури 56 часа по разорните земјотреси кои во понеделникот ги потресоа јужните региони на Туркије, известува „Анадолу“.
Бројни спасувачки екипи продолжуваат со акции на пребарување и спасување на регионите погодени од разорните земјотреси.
Спасувачите денеска, вложувајќи огромни напори, успеаја од под урнатините на станбена зграда во Шанлиурфа да извлечат 60-годишен татко и неговиот 27-годишен син.
По извлекувањето, таткото и синот се префрлени во болница.
„Најмалку 8.574 лица ги загубија животите од последиците на разорните земјотреси кои во понеделникот ги погодија јужните региони на Туркије“, потврди претседателот на Туркије, Реџеп Таип Ердоган.
Од последиците на земјотресите и во соседна Сирија животот го загубија 2.530 лица, а 4.645 се повредени.
- Разорни земјотреси кои ја потресоа Туркије на 6 февруари
Два силни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.
И турските области Газиантеп, Шанлиурфа, Дијарбакир, Адана, Адијаман, Малатја, Османие, Хатај и Килис се тешко погодени од земјотресите. Во текот на денот имаше и голем број последователни потреси со помал интензитет.
