Туркије: Израел изврши „злосторство против човештвото“ убивајќи над 100 цивили засолнети во училиште во Газа

АНКАРА (АА) - Израел изврши „ново злосторство против човештвото“ убивајќи над 100 цивили засолнети во училиште во населбата Ал-Дараџ во градот Газа, истакна денес турското Министерство за надворешни работи, јавува Анадолу.

„Овој напад уште еднаш покажа дека Владата на Нетанјаху има намера да ги саботира преговорите за траен прекин на огнот“, се наведува во соопштението на Министерството.

„Меѓународните актери кои не преземаат чекори за да го запрат Израел се соучесници во злосторствата на Израел“, се додава.

Рано утрово, израелската армија го гаѓаше со проектили училиштето Ал-Табаин во населбата Ал-Дараџ во кое се сместени раселени Палестинци, при што загинаа најмалку 100 Палестинци, соопшти владината Канцеларија за медиуми во Газа.

„Израелските напади беа насочени кон раселените луѓе додека ја извршуваа утринската молитва (сабах намаз), (што) доведе до брз пораст на бројот на жртви“, соопшти Канцеларијата за медиуми.

И покрај апелите во четвртокот од посредниците Египет, САД и Катар да се запрат непријателствата, да се постигне прекин на огнот и договор за размена на заложници, Израел продолжува со својата смртоносна офанзива во Појасот Газа.

Во израелската офанзива врз Газа од октомври минатата година убиени се речиси 39.700 Палестинци, главно жени и деца, а над 91.700 се повредени.

Израел е обвинет за геноцид пред Меѓународниот суд на правдата, кој му нареди веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред да започне копнената офанзива врз градот на 6 мај.