Турските аеродроми забележаа пораст на бројот на патници во август

АНКАРА (АА) - Турските аеродроми пречекаа 25,2 милиони патници во август, вклучувајќи ги и транзитните патници, што бележи зголемување од 1,9 отсто во однос на истиот месец минатата година, изјави турскиот министер за транспорт и инфраструктура, Абдулкадир Уралоглу, јавува Анадолу.

Податоците, објавени од Генералниот директорат на Државната управа за аеродроми (DHMI), покажуваат дека 9,2 милиони патници користеле домашни летови, додека речиси 16 милиони патувале на меѓународните линии.

Покрај растот на бројот на патници, турските аеродроми опслужија 231.699 авиони во август, вклучително и прелети, што претставува пораст од 2 отсто во споредба со претходната година. Значителен пораст забележа и воздушниот карго сообраќај, со вкупно 493.183 тони.

Двата главни аеродроми во Истанбул одиграа клучна улога во овој раст, опслужувајќи над 45 отсто од вкупниот број патници во воздушниот сообраќај во земјата минатиот месец. Аеродромот ИГА Истанбул пречека 7,7 милиони патници, што е зголемување од 1 отсто во однос на август 2022 година и менаџираше со 46.933 летови. Низ аеродромот „Сабиха Гокчен“, кој се наоѓа на анадолската страна на Истанбул, поминале 3,9 милиони патници и 21.468 летови.

Од јануари до август оваа година турските аеродроми опслужија приближно 154,9 милиони патници, што покажува зголемување од 8,4 отсто во споредба со истиот период минатата година. Вкупниот број на летови во оваа временска рамка достигна 1,5 милиони, вклучително и прелетите.