Amerîka: Li Sûdanê herdu aliyan ji bo agirbesteke 72 saetî li hev kirin

Wezîrê Karên Derve yê Amerîkayê Antony Blinken diyar kir ku li Sûdanê aliyên şer dikin ji bo agirbesteke şeva 24ê Nîsanê dest pê kir û qasî 72 saet wê dewam bike, li hev kirin.

Blînken der heqê şer û pevçûnên li Sûdanê da daxuyaniyeke nivîskî weşand û got: "Di 48 saetên dawîn da di encama gotûbêjên zêde hatin kirin da Hêzên Çekdar ên Sûdanê û Hêzên Piştgir a Bilez ji bo agirbesta şeva 24ê Nîsanê dest pê bike û qasî 72 saet wê dewam bike, li hev kirin."

Blînken got ku ew dixwazin li Sûdanê rêveberiya sivîl têkeve rewacê û hewl didin aliyên şer dikin jî ber bi vê hedefê va bînin.