Haydar Şahin
09 Tîrmeh 2020•Rojanekirin: 10 Tîrmeh 2020
Li Herêma Rojhilatê zivistan dirêj û bi zihmet derbas dibe. Heywandar û gundiyên li Qersê ji bo alifê zivistanê yê pez û dewarên xwe bi motor û tirpanan gihê diçinin.
Ji ber zivistana dirêj dikişîne heywandar kêmzêde 6 mehan heywanên xwe di hundir da xweyî dikin, nika jî ji bo alifê pez û dewarên xwe bidin ser hev dest gihaçinînê kirin û ew ê bi rojan vî karî bidomînin.
Gundî bi derketiya rojê diçin mêrgan dest bi çinîna gihê dikin û hetanî êvarê karên xwe didomînin.
Gihayê tê çînin ji bo hişk bibe û di gurz, balye û xiroman da nerize çendekî li erdê dimîne. Gundî piştî vê gihayê xwe dixin gurz, xirom an jî balye û li nêzî gund didin ser hev û dixin lod. Gihayê zêde bimîne jî difroşin û pê debara xwe dikin.
Gencay Demirê heywandar daxuyanî da nûçegihanê AAyê û diyar kir ku ji bo alifê zivistanê ji niha va amadehiyan dikin û alif didin ser hev.
Demir destnîşan kir ku dema giha tê asta çinînê dest pê dikin diçinin û wiha pê da çû: "Em pêşiya mêrgan diçinin, wan dixin balye û bi traktoran dikişînin dixin lod. Înşallah em ê demekê şûnda jî dest bi zevîçinînê bikin û ceh û genimê xwe biçinin. Gihaçinîn bi qasî hefteyekê dewam dike. Ji ber destê sibê hetanî êvarê em dixebitin. Ji mêrga ku me çinîbû û îro gihayê wê dikişînin 120-130 balye derketin. Em bi traktor û quweta milan va gihê dikişînin û dixin lod."
