ئۆپەراسیۆنی قەڵغانی فورات

ئەنقەرە - AA

لەچوارچێوەی ئۆپەراسیۆنی قەڵغانی فوراتدا، دوێنێ لەئەنجامی هێرشەکان بۆ سەر پێگەی تیرۆریستان لەباکووری سووریا، 9 چەکداری دیکە کوژران.

بەپێی ئەو زانیارییانەی لەلایەن سوپای تورکیاوە بڵاوکراونەتەوە، ئۆپەراسیۆنی قەڵغانی فورات بۆ سەر باکووری سووریا کە لە 24ی ئابدا دەستیپێکردووە و ئامانجی لێی لەناوبردنی هەڕەشەی رێکخراوە تیرۆریستییەکانە و بەرزکردنەوەی ئاستی ئاسایشی سنوورەکانە، درێژەی هەیە.

لە 107ەمین رۆژی ئۆپەراسیۆنەکەدا و لەئەنجامی ئەو پێکدادانانەی هاتوونەتە ئاراوە، 9 چەکداری رێکخراوی تیرۆریستیی داعش کوژران و ئۆتۆمبیلێکی زرێپۆش تێکشکێنرا.

لەسەرەتای دەستپێکردنی ئۆپەراسیۆنەکەوە، 42 مین و دووهەزار و 8 بۆمبی دەستکرد لەو ناوچانە پووچەڵکراونەتەوە کە لەداعش پاککراونەتەوە.