ئەفکان ئالا: "لەو ٤٣ کەسەی کوژراون ١٩یان بیانین"

وەزیری ناوخۆی تورکیا، ئەفکان ئالا سەبارەت بە رووداوە تیرۆریستییەکان بەگشتیی و لەسەرووی هەمووشیانەوە هێرشە تیرۆریستییەکەی فڕۆکەخانەی ئەتاتورک، زانیاریی دایە پەرلەمان.

ئالا رایگەیاند ''تاوەکو ئێستا ١٣ کەس دەستبەسەرکراون کە نۆیان تورک و چوارەکەی دیکەیان بیانین. رەگەز و ناسنامەی یەکێک لە خۆکوژەکان دیاریکراوە. ژمارەی کوژراوەکان ٤٣ کەسە بێجگە لەو کەسانەی لە خۆیان تەقاندووەتەوە. لەو ژمارەیە ١٩یان بیانین. ژمارەی ئەو بریندارانەش کە لە ئێستادا لە نەخۆشخانەن، ٩٤ کەسە''.

- ''٦٥٤ کەس بەهۆی پەیوەندییان بە داعشەوە دەسترگیرکراون''

وەزیری ناوخۆی تورکیا رایگەیاند ''پەیوەست بە داعش پێنج هەزار و ٣١٠ کەس دەستبەسەرکرابوون، لەو ژمارەیە بڕیاری دەستگیرکردن بۆ ٦٥٤ کەسیان دەرچووە. تەنها لە ساڵی ٢٠١٦دا هەزار و ٦٥٤ دەستبەسەرکراون، ٩٧١یان بیانین و ٦٦٣ کەس لەدەستبەسەرکراوەکان دەستگیرکراون. لەو ژمارە دەستگیرکراوەش ٣٧١یان بیانین''.