بڕیاری پێکھێنانی ناوچەیەکی داماڵڕاو لە چەک لە ئیدلب

سۆچی - AA

سەرکۆماری تورکیا، رەجەب تەیب ئەردۆغان و سەرۆکی رووسیا، ڤلادمیر پوتین کۆنگرەیەکی رۆژنامەوانی ھاوبەشیان رێکخست.

سەرکۆماری تورکیا، رەجەب تەیب ئەردۆغان لە کۆنگرەیە رۆژنامەوانییەکەدا گوتی: " بڕیارماندا لە نێوان ئەو ناوچانەی کە لە ژێر کۆنترۆڵی رژێم و ئۆپۆزسیۆن دان، ناوچەیەکی داماڵراو لە چەک پێکبھێنین".

ئەردۆغان لەبارەی رووسیا گوتیشی: "تاوەکو ئێستا چاوەڕوانین بۆ ئەوەی ھەرچی زووە جارێکی دیکە گەشتکردن لەنێوان ئەو دوو وڵاتە بەبێ ڤیزە دەستپێبکاتەوە، سەبارەت بەم بابەتەش وەزارەتە پەیوەندیدارەکانمان کاری لەسەر دەکەن ".

ئەردۆغان راشیگەیاند کە رووسیا و تورکیا بە ھەمانگی یەکتر ئەرکی دەورییەی ھاوبەش لە ھەردوو سنووری نێوان ناوچەی داماڵڕاو لە چەک ئەنجام دەدەن.

سەرکۆماری تورکیا ، ئەردۆغان باسی لە پرسی ئیدلب کرد و گوتی: "ھەر لە کۆبوونەوەکانماندا لەبەرچاوگرتنی نیگەرانییەکانی ھەردوولا لەسەر پرسی ئیدلب، ھەنگاوی باشمان ناوە لەسەر دۆزینەوەی رێگە چارەیەک".

ئەردۆغان لەبارەی دۆخی ھێزەکانی ئۆپۆزسیۆنی سووریا گوتی: "ھێزەکانی ئۆپۆزسیۆن لە شوێنی خۆیان دەمێنەوە. وا دەکەین کە گرووپە توندڕەوەکان لە ناوچەکەدا چالاکی ئەنجام نەدەن".

ئەردۆغان گوتیشی: "گەورەترین ھەڕەشە بۆ سەر داھاتووی سووریا، بەدەر لە ئیدلب، لە ھێلانەکانی تیرۆر لە رۆژھەڵاتی فوڕات سەرچاوە دەگرێ".

ئەردۆغان راشیگەیاند کە بەو رێککەوتنە ئیدلب لە قەیرانێکی مرۆیی گەورە رزگاری دەبێت .

سەرکۆماری تورکیا، رەجەب تەیب ئەردۆغان گوتیشی: " تورکیا چۆن لە سەرەتای قەیرانی سووریاوە لە پاڵ ئەو وڵاتە بووە لە بابەتی ئیدلب-یشدا بە ھەمان شێوە ئەوەی لەسەری بێت ئەنجامی دەدات ".

ئەردۆغان ئاشکراشی کرد کە لە ئێستادا تورکیا خاڵی چاودێری لەو ناوچانە داناوە کە لە ئیدلب داماڵراون لە چەک.