دیاربەکر.. نۆژەنکردنەوەی خانووە دێرینەکانی شارۆچکەی سوور

دیاربەکر-AA

لە ماوەی رابردوودا شارۆچکەی سوور سەربە پارێزگای دیاربەکر، بەهۆی پێکدادانی نێوان هێزە ئەمنییەکانی تورکیا و تیرۆریستانی پەکەکە زیانیان بەرکەوتبوو.

بەمەبەستی نۆژەنکردنەوەی خانووە دێرینەکانی شارۆچکەکە و گەڕاندنەوەی ماف بۆ دانیشتوانەکەی چەندین پڕۆژەی گرنگ لە شارۆچکەکەدا جێبەجێ کراون.

لە چوارچێوەی پڕۆژەکانی ئاوەدانکردنەوەدا لە چەند گەڕەکێکی جیاوازی شارۆچکەی سوور دەست بە پڕۆژەی نۆژەنکردنەوەی ٣٤٧ خانوو کرا.

لە ئێستاشدا کاری نۆژەنکردنەوە لە ١٧٦ خانوودا، دەستیپێکردووە و دوای کۆتاییهاتنی کاری نۆژەنکردنەوەکە رادەستی خاوەنەکانیان دەکرێنەوە.

محەمەد ئاڤلار یەکێک لە ئەندازیارە تەلارسازەکانی پڕۆژەکە لە لێدوانێکیدا بۆ ئاژانسی ئانادۆڵو باسی لەوە کرد خانووەکان لەڕێی نۆژەنکردنەوەوە دەگەڕێنرێنەوە سەر شێوە دێرینەکەی سەرەتایان و گوتی: "هەوڵدەدەین بە لەبەرچاوگرتنی شێوەی کولتووری تەلارسازی خانووەکان کاری نۆژەنکردنەوەکە ئەنجام بدەین. لە کارەکاندا ئەو بەردانە بەکاردەهێنین کە تایبەتن بە پارێزگای دیاربەکر و لە چیای کاراجا دەردەهێندرێن".